Apoio da Deputación de Lugo ás actividades da nosa Asociación

 

A Vicepresidencia da Deputación de Lugo - Área de Cultura, ven de comunicarnos que os Orzamentos da Institución Provincial para este ano 2022, recollen unha subvención directa nominativa a favor da Asociación socioeducativa Antonio Gandoy, para a realización das súas actividades na provincia de Lugo, por importe de 15.000 euros.

Grazas a esta subvención, ás outorgadas por distintos concellos, e á achega económica das familias participantes, esta Asociación pode seguir camiñando cara a consecución dos obxectivos polos que foi creada:

• Preservar e difundir o legado inmaterial referido ao pensamento socioeducativo de Antonio Gandoy Díaz, a través da prestación de actividades que viña desenvolvendo o programa Preescolar na Casa por el impulsado.
• Promover unha educación que capacite á persoa para comprender a realidade, intervir nela e vivir en harmonía consigo mesmo, cos demais e coa natureza.
• Difundir unha cultura da infancia, das súas necesidades, potencialidades e dereitos de acordo coa Convención dos Dereitos do Neno adoptada e ratificada pola Asemblea Xeral das Nacións Unidas o 20 de Novembro de 1989.
• Fomentar a educación da infancia a través de actividades preventivas e formativas que promovan o exercicio da parentalidade positiva.
• Promover a creación de servizos de atención socioeducativa a nenas/os e/ou familias de diferentes colectivos, do ámbito rural, poboación dispersa e contornos familiares de especial vulnerabilidade, co fin de promover a igualdade de oportunidades e a conciliación da vida familiar e laboral.
• Fomentar o estudo, conservación e difusión da cultura tradicional galega así como o emprego e promoción da lingua galega.
• Fomentar a relación con entidades públicas e/ou privadas en aspectos que inciden no desenvolvemento e benestar da infancia e da familia.