Asinado o Convenio co Concello de Láncara para o ano 2023

 No día de onte, 22 de marzo de 2023, tivo lugar a sinatura do Convenio Regulador da subvención nominativa directa a favor da Asociación socioeducativa Antonio Gandoy, mediante o que se outorgan 3.801 euros para o desenvolvemento do proxecto "Espazo das Familias" que se leva a cabo na Póboa de San Xíao  tódolos luns lectivos, en horario de mañá, durante o ano 2023.

Neste Espazo participan, semanalmente, un total de seis familias con nenas e nenos menores de tres anos que debaten, reflexionan, comparten, sobre todas as inquedanzas e preocupacións que se van presentando na crianza e desenvolvemento das súas fillas e dos seus fillos.

O grupo está coordinado pola orientadora Gloria Pazó, que lles achega cada semana diversos temas, materiais e instrumentos que lles axuden a mellorar a súa práctica educativa no día a día do seu fogar.